النهر و خيام او دم النحر
ثلاثة اشهود گالت الخبر
باللي جرى او صار حگ المنتظر
########
يوم راح الكربله ابدمعاته
سيدي المهدي يجر ونّاته
راد يطلب بالجرى ثاراته
للحسين او سايل ابآهاته
و الگلب ويلاه جمره يستعر
ثلاثة اشهود گالت الخبر
باللي جرى او صار حگ المنتظر
########
گال نهر العلگمي بونينه
فوگي گطعوا بو الفضل چفّينه
او سهم صاب الساگي وسطة عينه
و بعمد راسه العدا امهشمينه
او خلّه سكنه و الطفل و أم الخدر
ثلاثة اشهود گالت الخبر
باللي جرى او صار حگ المنتظر
########
او يسمع المهدي بچي كل الخيم
احنا حرگونا او فرّت الحرم
او زاد عند زينب يمولانا الألم
او ما أحد بيتامها منهم سلم
او ظلّت النيران بينا تستعر
ثلاثة اشهود گالت الخبر
باللي جرى او صار حگ المنتظر
########
او شاف دم المنحر ابذاك الثرى
او ناشده ويلاه منهو الفجّره
گال له سيف الشمر يوم انحره
و بگى أجري حتى يوم الآخره
او كل ضلع وسط الظهر ويّا الصدر
ثلاثة اشهود گالت الخبر
باللي جرى او صار حگ المنتظر
########
انحنى المهدي او زادت حسرته
او صار يلطم على صدره او جبهته
يبچي الجدّه او عمّه او عمّته
او للحشر تبگى يويلي اقرايته
او بالجرايم شاهده طول الدهر
ثلاثة اشهود گالت الخبر
باللي جرى او صار حگ المنتظر
@@@@@@
أبو فراس الحمراني
... نسألكم الدعاء ...