قمر سعدي الدنيا ما اظلمّت بعيني من جنيته
نور وجنـاته أوجّد بيه دربي لـو عميته
فوق صدري القمر غمّض نجمتين و كمّطيته
نـام يبني آنـه هـاي الليل سهرانة طويته
وسط قلبي افـْرَشِتلك مهدك و بضلاعي حميته
لجن خوفي تزعجك دقات قلبي اللي اسكنيته
يـا حبيبي اشعاد لـو قلبي عشـانك وقفيته
انته روحي و الهوى الأتنفسه و عمر القضيته
انته غصن المِن نمير احشاي غذيته و سقيته
*************
لجن مدري هجس فكري بسواد الليل
أظن يبني الدهر مني يهد الحيـل
بسهم فرقاك يضيع ارباك و اصيح بويل
يبعد الروح خنقني النوح و دمعي يسيل
**************
يوليدي مدري هالليل لكشر
اشيخفي ابظلامه لو صبحه اسفر
حلم الحلمته و تعب التعبته
و كل الذخرته جني فقـدتـه
هذي العساكر حاصرتنه وسدّت البر و جن المنايا طيور فوق اخيمنا تفتر
و جن العطش في قلبك توجّر
و جن صدري امن اللبن ما در
مدري شتــاني احسها رزية
امنين اجتني هالغاضرية
اطلَعَت من خيمتها و الدمعات منها ساجمة
و الرضيع اعله صدرها ايلوج من حرّ الظما
التفتت و لن حرمة يم باب الثنية املازمة
اتنوح مكسورة الخاطر و الصدرها لاطمة
صـاحت ام الطفل يا زينب اجيتج لايمة
هذا طفلي يلوج ظامي وين ابن حامي الحما
صـاحت الحرمة يحرّة آني امه فـاطمة
جيت أتفقـّد العيلة و بالمصـايب هـايمة
***************
دنت أم الـرضيع و هملت الـدمعـة
عطش طفلي شعب دلالـي يـالبضعـة
و صدري جف و حِرِتْ بيه مقدر آرضعه
بجت أم الحسن و اختـنقت بلـوعـة
****************
و اتناولتـّـه امن ايدين أمه
و شمّت وريده و ظلت تضمه
و صاحت يأمه تنحرمي منه
المحسن اوليدي ينطره بالجنة
طفلج يظل عطشان متلظـّي يحرّة و نبلة عدو تسقيه باجر دمّ نحره
ايرفرف اجفوفه و يمزع البردة
و ابنحر لحسين يشبـج ابـإيده
طفلج يحرة يذكرني بمصاب
طفلي التعفـّر يم عتبة الباب
تـاه مني الراي و اخذيت الطفل لابن الزجيـة
يبو اليمـة خل يموت الطفل بيدك مو بـِدَيـّـه
مقدر انظر مولحت عينه امن الظما و احشاهْ لظيّة
حمل طفله و ضمه الصدره و شهق شهقة شجية
لفت بـالي قطرة وقعت من ادموع ابن الزجية
فوق خد الطِفـْـلْ و لنّه يشوبح بعينه لـَبـَيّه
ميّل السـانـه لخدّه ظنـّتـه قطرة امّـيـة
و شفت حاله غوركت عيني و زاد النوح بيّة
*****************
الى العسكر حِمَل طفله و مشى بدربه
يحـاجيهم رضيعي قـولوا اشذنبـه
انظروه امن العطش جيف استعر قلبه
اذا عدكم رحم دسقوا الطفل شربـة
**************
وبن سعد نادى لبّو المظلوم
و اسقوا رضيعه من نحره ادموم
يـا حرملة عا ين نحر طفله
خذ قوسك و صــــوّب بيه نبلة
صوّب بسهمه النحره و مزّق وريده و الطفل فج عينه لبوه و رفرف ايده
و من دمّه شالِ…….وللسما ذبّه
صاح و تزفّر وينادي ربّه
ربي تقبّـل مني القربان
و انته الشاهد اعله العدوان