حسين حسين
وينه السفر جواده يساله
من مكه خذني يا الله كربله
حسين حسين
######
بس ما صعد ظهر المهر او حرّك ركابه ابحسره
نادى المهر بن فاطمه او خنگت لصدره العبره
وين الگصد يا ابن النبي حيدر علي والزهره
گلّه أراضي كربله يا مهر هاذي السفره
أرض الكرب والحيره والبله
من مكه خذني يا الله كربله
حسين حسين
######
يا الله استعد يا الله استعد حگ المصايب باچر
أفگد أنا كل أخوتي و نصاري و بگى حاير
و الجيش حولك چم ألف آه يا جوادي داير
او تهجم على اخيامي العدا او تگصدني العساكر
او تنظر جبيني ادمومه سايله
من مكه خذني يا الله كربله
حسين حسين
######
خذني إلى اللي منكتب من الله آه عليّه
باچر يجيني السهم من حرمله إليّه
او من ظهرك أوگع بالدّما يا مهري للوطيّه
او يگصدني شمر ابصارمه و المهجه ملتظيه
و انته تحمحم صوب العايله
من مكه خذني يا الله كربله
حسين حسين
######
وياك تگصد مصرعي زينب تون ابحسره
و تشوف عندي الشمر نحري يريد إيهبره
و يدوس صدري ابن الخنا او تندب على الزهره
و تشوف تالي كربله يا مهري كلها حمره
أحمل جرح ما حد يتحمله
من مكه خذني يا الله كربله
حسين حسين
@@@@@
أبو فراس الحمراني
... نسألكم الدعاء ...