باطوف حول الكعبه آخر طواف اوياكم
او باطوف باچر خويه في كربله ابليّاكم
باچر أنا اتخلوني أشواط سبعه ابروحي
حولك أطوف ابنحرك يا ليت راحت روحي
خويه الشمر يدفعني عنّك و يزيد اجروحي
و التلبيه متجوني زينب أنا أنخاكم
من صوب جسمك أركض او صوب الشريعه أسعه
او جثة أخويه الكافل أنظر لها متگطعه
عبّاس جتّك زينب صوت الأخت متسمعه
لبست احرام الذله او ما چنها جت بحماكم
و امبيتي بين أيتامي لنّه الخيم حرگوها
باسكّت الضربوها او باسلّي السحبوها
تسبيحتي او تهليلي زينب وسف سلبوها
حج كربله و طوافه غسله ترى امن ادماكم
ما برمي الجمراتي جمراتي ابترميني
اتصوبني بس ما أنظر نحر الطفل بعيوني
او لكبر علي و الجاسم جمراتهم تچويني
لا اتگول طاف أفّادي في كربله او خلّاكم
بعد الطواف اوداعي الجسمك او جسم الغالي
يوكزني شمر ابرمحه و يصيح راح الوالي
هذا طوافي باچر في كربله و حوالي
او بعد الرحيل ابسبيي ما ظنَتي بلگاكم
@@@@@@@
أبو فراس الحمراني
... نسألكم الدعاء ...