اشلون أنسى عاشور ويّامه

محرم 1447

اشلون أنسى عاشور ويّامه 
او دمعي لجل المظلوم يتهامه
 عوّد خيالي حادي امحرّم عليّه
و النّاعي شال الصوت يا روح الزچيّه 
(وحـگ راسك المقطوع ياشمس المضيّه)
(لـلحشر مـاننسى مـصابك و الـرزيّه)
او علحسين إينوحون خدّامه 
اشلون أنسى عاشور ويّامه 
و بيوم ثاني زادت ابدلّالي لحزان
من ناده صوت ال يقرا للمذبوح عطشان
(يحسين سافر و اترك اديارك و لوطان)  
(چنّي أعاين جثّتك للخيل ميدان) 
او شال ضعنه المظلوم بيتامه 
اشلون أنسى عاشور ويّامه 
و بيوم ثالث أستمع هاذي الرزيّه
او لام سلمه ودّع أبو النفس الأبيّه
(أدري أظل مطروح برض الغاضريّه)
(وهالصّدر هذا يصير تحت الأعوجيّه)
 ودّع الكعبه او نزع لحرامه 
اشلون أنسى عاشور ويّامه
و بيوم رابع يشتعل في صدري لمصاب
و بچي لمسلم من يرد الناعي لجواب
(گالت شربت الماي لا توگف على الباب) 
(عيب اعلى مثلك وگفته ببيوت لجناب) 
او تلطم ال ينوحون الهامه 
اشلون أنسى عاشور ويّامه
و بيوم خامس حگ ابن خير البرايا
من ينشد الوالي ابتدت كل الرزّايا
(انـجان هـذي كـربلا بـشروا ابّلايا) 
(او نـزلوا تـرى لاحـت علامات المنايا) 
او صاح بسم العباس و حزامه 
اشلون أنسى عاشور ويّامه
و بيوم سادس بصفگ ابإيدي على إيد
او بطلب من الناعي عليك احسينك اتعيد
(نادى حبيب النّوح و الحسرات متفيد) 
(اتوكّل على الله او كربله عنّا مهي ابعيد) 
او قاد حزب الأنصار و أعلامه 
اشلون أنسى عاشور ويّامه
و بيوم سابع بوا الفضل في خاطري جال
او گال اللي ينعى زينب اتعاين للبطال
(عباس باليمنه و بو سكنه بالشمال) 
(صبّوا على العسكر من البردين زلزال) 
او سكنه ترگب الماي بخيامه 
اشلون أنسى عاشور ويّامه
و بيوم ثامن أطلب النعّاي بهداي 
بس ما ينادي سكنه گالت فاگده الراي
(و الله يعمّه لو تخـلّوني على اهواي) 
(لاروح لـلّي معفّرينـه بجـانب المـاي) 
و الگلب لجسّام بآلامه 
اشلون أنسى عاشور ويّامه
و بيوم تاسع تصرخ السبع العليّه 
من يندب الأكبر شهيد الغاضريه
(ادركـني يَـبويه وجيب لي قطرة اميّه) 
(رفـرف عـلى راسي ترى طير المنيّه)
او ليل عاشر ابچيه ما نامه 
اشلون أنسى عاشور ويّامه
و بيوم عاشر ليه قرا الناعي شجانا
سكنه تنادي عمّتي ما رد حِمانا
(خالي من الوالي يعمّه المهُر جانا) 
(متخضّب ابدم الولي يسحب اعنانه) 
او لينا صوّب الجور إسهامه 
اشلون أنسى عاشور ويّامه
و بيوم لحدعشر بگت دمعه ابعيوني
حگ الوديعه من بچت ياللي اتركوني
(لا تگول عنّي سافروا ما ودّعوني) 
(شالوا خواتي او للگبر ما شيّعوني) 
او شافت اعلى لتراب لعمامه 
اشلون أنسى عاشور ويّامه
@@@@@@
أبو فراس الحمراني