بوداعة الله اتصيح يمّه يا زچيّه
لكربله بنشيل نادتها رقيّه
######
فوگ الگبر ظلّت تهل يا وسفه عبره
وتصيح ضمّيني بلحدچ آه يزهره
هذا الوداع اعطيني يم احسين نظره
لكربله بنشيل نادتها رقيه
######
بنروح وادي كربله او نترك هالديار
و لا أظنها رجعتي گلبي اشتعل نار
و ترك أبويه ابكربله من فوگ لوعار
لكربله بنشيل نادتها رقيه
######
اخذيني ما عندي صبر يا ضي عيوني
و آنه ربيبة الخدر و يضيعوني
بنت المعزه و الحشيمه يضربوني
لكربله بنشيل نادتها رقيه
######
جاني الخبر من والدي يا يمَه لحسين
گلّي بعد عيني سبيّه آه تروحين
او مجلس يزيد امغلّله ويلي تدخلين
لكربله بنشيل نادتها رقيه
######
خبّرني ما بين العدا راسه يجيبوه
و نظر إليه وسط الطّشت بدماه حطّوه
و سنانه كلها امكسّره وا ويلي خلّوه
لكربله بنشيل نادتها رقيه
######
تالي على راس الولي أوگع ونا نوح
و ندب على الغالي دكلّمني يمجروح
و تروح فوگ الرّاس يمّه منّي الرّوح
لكربله بنشيل نادتها رقيه
@@@@@
أبو فراس الحمراني
... نسألكم الدعاء ...