يالتدفنون الغالي صوب الأبو دفنوني
مگدر على فرگاته ابگبر الأبو واروني
يصعب عليّه ارجوعي و نظر خليّه داره
و تذكّره بحزاني تحت الترب أنواره
بعد الأبو أفكاري تبچي عليه محتاره
ويّاه بس أرجاكم وسط اللحد خلّوني
و گليبي ما يتحمّل أصبح يتيم ابصغري
او سهمه وسط دلّالي صوّبني تالي دهري
معذور دمعي لجله لو كل حياتي يجري
او معذور دمعي يجرح كل يوم لجله اعيوني
چيفه البصر و الحيله لمّن أحن للغالي
و ندب أبويه وينه او يسعر جمر دلّالي
سافر معاه اسروري او راحت جميع آمالي
او من يذكرونه صوبي تلهب تراها اشجوني
لحظة وداع الوالد يتعب فؤادي يتعب
من تفتحون أكفانه عن وجهه چم أتعذّب
مگدر أشوفن خدّه ويلي عليه امترّب
ودّي معاه أتمدّد منّه فلا اتحرموني
@@@@@@
أبو فراس الحمراني
... نسألكم الدعاء ...